Stoltenberg: Balanca e fuqisë po ndryshon me shpejtësi në Indo-Paqësor

Sekretari i Përgjithshëm i NATO-s, Jens Stoltenberg, tha se balanca e fuqisë po ndryshon me shpejtësi në rajonin Indo-Paqësor, transmeton Anadolu Agency (AA).

Duke folur në një konferencë të përbashkët për media pas një takimi me kryeministrin japonez Kishida Fumio në kryeqytetin japonez Tokio, Stoltenberg tha se bota është në një “pikë kthese historike në mjedisin më të rëndë dhe kompleks të sigurisë që nga fundi i Luftës së Dytë Botërore”.

Duke argumentuar se siguria e Euro-Atlantikut dhe Indo-Paqësorit është e lidhur ngushtë, ai përsëriti se kjo gjendje kërkon forcimin e mëtejshëm të bashkëpunimit midis Japonisë dhe aleancës.

Ai theksoi se NATO dhe Japonia janë të mendimit se një ndryshim i njëanshëm i status quo-së me forcë apo detyrim nuk është i pranueshëm askund në botë.

Stoltenberg tha se aleanca kundërshtoi fuqishëm çdo përpjekje të njëanshme për të ndryshuar status quo-në me përdorimin e forcës ose detyrimit në Detin e Kinës Lindore dhe paralajmëroi për zgjerimin e aftësive ushtarake të Kinës.

“Për sa i përket forcimit të shpejtë të aftësive ushtarake të Kinës dhe zgjerimit të aktiviteteve ushtarake, ne e inkurajojmë fuqimisht Kinën që të përmirësojë transparencën dhe të bashkëpunojë në mënyrë konstruktive me përpjekjet ndërkombëtare për kontrollin e armëve, çarmatimin dhe mospërhapjen e armatimit”, shtoi ai.

Stoltenberg tha se pozicioni i aleancës ndaj Tajvanit mbetet i pandryshuar, duke bërë thirrje për një zgjidhje paqësore të problemit.

Në lidhje me Korenë e Veriut, ai tha: “Ne i bëjmë thirrje Koresë së Veriut që të respektojë plotësisht të gjitha rezolutat përkatëse të Këshillit të Sigurimit të OKB-së dhe të braktisë armët e saj bërthamore dhe programet ekzistuese bërthamore, si dhe çdo program tjetër të armëve të shkatërrimit në masë dhe raketave balistike në mënyrë të plotë, të verifikueshme dhe në mënyrë të pakthyeshme”.

MARKETING