Zelensky: Putin po përgatit rusët të përdorin armë bërthamore, por nuk është i gatshëm që ta bëjë

Zelensky: Putin po përgatit rusët të përdorin armë bërthamore, por nuk është i gatshëm që ta bëjë
In this photo provided by the Ukrainian Presidential Press Office, Ukrainian President Volodymyr Zelenskyy addresses the nation in Kyiv, Ukraine, late Monday, March 7, 2022. (Ukrainian Presidential Press Office via AP)

Presidenti ukrainas Volodymyr Zelensky ka bërë thirrje për sanksione parandaluese ndaj Rusisë, duke thënë se zyrtarët e vendit kanë filluar të “përgatisin shoqërinë e tyre” për përdorimin e mundshëm të armëve bërthamore në luftë.

“Ata kanë filluar të përgatisin shoqërinë e tyre. Kjo është shumë e rrezikshme”, tha Zelensky në një intervistë për BBC.
“Ata nuk janë gati ta bëjnë këtë. Por ata kanë filluar ta komunikojnë atë. Ata nuk e dinë nëse do t’i përdorin apo jo. Mendoj se është e rrezikshme edhe të flasim për këtë”, shtoi ai.

Ndërkohë, presidenti ukrainas mohoi nxitjen e sulmeve ndaj Rusisë, duke pretenduar se një deklaratë e mëparshme ishte përkthyer gabimisht.

Intervista e Zelensky erdhi disa orë pasi presidenti amerikan Joe Biden tha se kërcënimi rus për të përdorur armë bërthamore e ka sjellë botën më afër se kurrë “Armagedonit”, që nga kriza e raketave Kubane gjatë Luftës së Ftohtë.

Në të njëjtën kohë, ai theksoi se duhet veprim tani, pasi kërcënimet e Rusisë përbëjnë një “rrezik për të gjithë planetin”.

Moska, pretendoi presidenti ukrainas, “ka bërë tashmë një hap” duke sekuestruar termocentralin bërthamor të Zaporizhia, termocentrali më i madh bërthamor në Evropë, të cilin Presidenti Putin po përpiqet ta kthejë në pronë ruse.

“Bota mund të ndalojë veprimet e pushtuesve rusë”, shtoi Zelensky.

“Bota mund të zbatojë paketën e sanksioneve në raste të tilla dhe të bëjë gjithçka për t’i bërë ata të largohen nga centrali bërthamor.”

Javët e fundit, ushtria ukrainase ka bërë përparime të rëndësishme në lindje dhe jug të vendit, duke rimarrë qytete dhe fshatra edhe në zonat që Kremlini pretendon se janë tani pjesë e Rusisë.

“E vetmja gjë që Putini ka frikë nuk është një sulm bërthamor. Ai i frikësohet shoqërisë së tij, njerëzve të tij. Sepse vetëm populli mund ta zëvendësojë atë, t’ia heqë pushtetin dhe t’ia japë një personi tjetër”, theksoi Zelensky.