SHBA, Britania dhe Franca vijnë me një deklaratë të përbashkët rreth pretendimeve ruse se Ukraina po përgatitet të hedhë një “bombë të pistë”

SHBA, Britania dhe Franca vijnë me një deklaratë të përbashkët rreth pretendimeve ruse se Ukraina po përgatitet të hedhë një “bombë të pistë”

Kryediplomatët e SHBA-së, Francës dhe Britanisë bënë një deklaratë të përbashkët, duke dënuar përpjekjet e rreme të Rusisë për të akuzuar Ukrainën se po përgatitet të hedhë një “bombë të pistë” në territorin e saj.

Teksti i deklaratës së përbashkët është publikuar në faqen e internetit të Departamentit të Shtetit të SHBA-së, përcjell Telegrafi.

“Ne, Ministrat e Jashtëm të Francës, Mbretërisë së Bashkuar dhe Shteteve të Bashkuara, përsërisim mbështetjen tonë të palëkundur për sovranitetin dhe integritetin territorial të Ukrainës përballë agresionit të vazhdueshëm të Rusisë. Ne mbetemi të përkushtuar të vazhdojmë të mbështesim përpjekjet e Ukrainës për të mbrojtur territorin e saj aq sa të ketë nevojë”, theksohet në deklaratë.

Në të njëjtën kohë, vihet re se krerët e agjencive të mbrojtjes të tre shteteve kanë biseduar më parë me shefin rus të mbrojtjes Sergei Shoigu, me kërkesë të këtij të fundit.

Deklarata gjithashtu thotë se të tre vendet shprehën një qëndrim të vetëm, përkatësisht se ata “refuzojnë akuzat e rreme të Rusisë se Ukraina po përgatitet të përdorë një bombë të pistë në territorin e saj”.

Përveç kësaj, vendet perëndimore kanë paralajmëruar Federatën Ruse se do të ekspozojnë çdo përpjekje të Kremlinit për t’i përdorur këto akuza si pretekst për përshkallëzim.

“Ne refuzojmë më tej çdo pretekst për përshkallëzim nga Rusia”, nënvizohet në deklaratën e përbashkët.