OBSH: Brenda 2 viteve, mbi 17 milionë njerëz në Evropë kishin simptoma të COVID-19 për të paktën 3 muaj

OBSH: Brenda 2 viteve, mbi 17 milionë njerëz në Evropë kishin simptoma të COVID-19 për të paktën 3 muaj

Organizata Botërore e Shëndetësisë (OBSH) njoftoi se në rajonin e Evropës më shumë se 17 milionë njerëz luftuan me koronavirusin për të paktën tre muaj në dy vitet e para të pandemisë COVID-19, transmeton Anadolu Agency (AA).

Në hulumtimin e kryer nga Drejtoria Evropiane e OBSH-së me Institutin e Matjes dhe Vlerësimit të Shëndetit (IHME), i lidhur me Shkollën e Mjekësisë të Universitetit të Washington-it në SHBA, u publikuan të dhënat për dy vitet e para të pandemisë.

Sipas hulumtimit, në periudhën 2020-2021, të paktën 17 milionë njerëz në 53 vende të Rajonit Evropian të OBSH-së kishin simptoma të COVID-19 për të paktën tre muaj.

Sipas OBSH-së, ata që shfaqin simptoma të COVID-19 për tre muaj ose më shumë përkufizohen si persona “që kanë kaluar COVID-19 të gjatë”.

Në këtë periudhë kohore, ndërkohë që rastet e “COVID-19 të gjatë” u rritën me 307 për qind në rajon, thuhet se rreziku i infektimit me “COVID-19 të gjatë” te femrat ishte dy herë më i lartë se tek meshkujt.

Drejtori i OBSH-së për Evropën, Dr. Hans Kluge, duke nënvizuar se shumë gjëra ende nuk janë mësuar për shkaqet dhe efektet e COVID-19 “të gjatë”, tha: “Miliona njerëz në rajonin tonë po vuajnë ende nga simptomat dobësuese muaj pas infektimit të parë me COVID-19. Ata nuk mund të vazhdojnë t’i përjetojnë ato në heshtje. Qeveritë duhet të punojnë së bashku me institucionet shëndetësore për të gjetur zgjidhje”.

145 milionë njerëz në mbarë botën kanë simptoma të zgjatura të COVID-19

Drejtori i IHME-së Dr. Christopher Murray, nga ana tjetër, informoi se si rezultat i hulumtimit, është gjetur se 145 milionë njerëz në mbarë botën përjetuan tre nga simptomat e gjata të COVID-19 në dy vitet e para të pandemisë.

Murray gjithashtu tha se miliona njerëz vazhdojnë të jetojnë me këto simptoma për shkak të efekteve të gjata të COVID-19, duke nënvizuar se shëndeti dhe jeta e përditshme e këtyre njerëzve është e prekur rëndë.