Në Armatë pranohen 200 ushtarë të rinj profesionistë

Në Armatë pranohen 200 ushtarë të rinj profesionistë

“Një ushtri e fortë, e pajisur dhe e modernizuar, e aftë për t’iu përgjigjur të gjitha sfidave. Sot, Armata e Republikës së Maqedonisë së Veriut është institucioni që gëzon besimin më të madh te qytetarët, dhe kjo është me të vërtetë një nder i madh, por edhe obligim për të gjithë ne”, tha ministrja e Mbrojtjes Slavjanka Petrovska në ceremoninë e sotme në Kazermën “Ilinden” me rastin e pritjes së 200 ushtarëve të rinj profesionistë në radhët e Armatës së Maqedonisë.

Ministrja ushtarëve të rinj u tha të jenë krenarë që bëhen pjesë e një institucioni që funksionon si një familje që nuk njeh gjini, fe, etni, një institucion më i respektuar dhe më i vlerësuar, institucion në të cilin Ministria e Mbrojtjes dhe Gjeneralshtabi do të jetë gjithmonë me ta.

“Detyra jonë është që ju të jeni të pajisur mirë, të punoni në kushte të shkëlqyera, të keni armë të reja dhe moderne, të keni paga që i përgjigjen punës tuaj, energjive dhe njohurive që investoni”, tha Petrovska.

Petrovska shtoi se nga sot ushtarët e rinj hyjnë në një institucion buxheti i të cilit është në rritje të vazhdueshme, në një profesion në të cilin bëhen investime serioze në kushtet e punës dhe standardin e të punësuarve dhe në një profesion ku zhvillimi i potencialit njerëzor është jashtëzakonisht i rëndësishëm.

“Stërvitja juaj fillon sot. Ajo do të kryhet nga profesionistë të lartë që kanë filluar karrierën e tyre si ju. Gjatë gjithë karrierës suaj, do të keni mundësinë të mësoni nga kolegët tuaj nga vendet aleate të NATO-s. Do të mësoni, do të bashkëpunoni dhe do të vazhdoni të ndërtoni sistemin e mbrojtjes, sigurisë dhe qëndrueshmërisë, sistem në të cilin të gjitha ne vendet anëtare të aleancës më të madhe ushtarako-politike në botë kontribuojmë për stabilitetin dhe sigurinë globale”, tha ministrja Petrovska.

Në ceremoninë e sotme me rastin e pritjes së ushtarëve profesionistë morën pjesë shefi i Shtabit të Përgjithshëm, gjeneral nënkolonel Vasko Gjurçinovski, zëvendësministri i mbrojtjes Bashkim Hasani, zëvendës shefi i shtabit të përgjithshëm, gjeneralmajor Azim Nuredin, sekretari shtetëror në Ministri, Vladimir Ançev dhe zyrtarë të tjerë të lartë, përfaqësues nga Armata dhe Ministria e Mbrojtjes.

Në konkursin publik që u publikua në shtator të këtij viti aplikuan fillimisht 900 kandidatë dhe nga 200 ushtarë profesionistë të pranuar, 184 janë meshkuj dhe 16 femra me përfaqësim nga të gjitha bashkësitë etnike.