Lufta mes Rusisë dhe Ukrainës, Koreja e Veriut: SHBA ta mbajë gojën mbyllur!

Lufta mes Rusisë dhe Ukrainës, Koreja e Veriut: SHBA ta mbajë gojën mbyllur!

Koreja e Veriut po bëhet aktive në deklaratat zyrtare mbi luftën mes Rusisë dhe Ukrainës duke mohuar të ketë mbështetur ushtarakisht Moskën, por nga ana tjetër duke mbështetur aneksimin e territoreve ukrainase nga Kremlini.

Pheniani ka pohuar se kurrë nuk e ka furnizuar Rusinë me armë apo municion dhe nuk planifikon ta bëjë këtë, duke shtuar se deklarata “të pamatura” të SHBA-së për shitjet e armëve ishin një përpjekje për të dëmtuar imazhin e Koresë së Veriut.

“Kohët e fundit, SHBA dhe forcat e tjera armiqësore folën për ‘shkeljen e një rezolute’ të KS të OKB-së [këshillit të sigurimit të OKB-së], duke përhapur një ‘thashethem për marrëveshje armësh’ midis DPRK [Republika Popullore Demokratike e Koresë] dhe Rusisë. Ne kurrë nuk kemi eksportuar armë apo municione në Rusi dhe nuk planifikojmë t’a bëjmë”, tha të enjten agjencia e lajmeve KCNA e kontrolluar nga shteti, citon noa.al.

Zëvendësdrejtori i përgjithshëm i Byrosë së Përgjithshme të Pajisjeve të Ministrisë së Mbrojtjes Kombëtare të Koresë Veriore i bëri thirrje Uashingtonit që të ndalojë së bëri “deklarata të pamatura” dhe “të mbajë gojën mbyllur”.

Reagimi vjen pasi zyrtarët e administratës Biden publikuan një vlerësim të deklasifikuar të inteligjencës amerikane se Koreja e Veriut ishte në proces shitjeje armësh ndaj Rusisë, në shkelje të sanksioneve të Këshillit të Sigurimit të OKB-së që ndalojnë Phenianin të importojë ose eksportojë armë.

Inventari thuhet se përfshin miliona predha artilerie dhe raketa. Ky furnizim vjen si mbështetje për përpjekjet e Moskës për të lehtësuar mungesat e rënda të furnizimit në Ukrainë, pasi Kremlini përballet me kontrolle dhe sanksione eksporti armësh, kontrolle të udhëhequra nga SHBA.

Zyrtari tha megjithatë se Koreja e Veriut nuk i njeh kurrë sanksionet “e paligjshme” të OKB-së të vendosura në përgjigje të programeve bërthamore dhe raketore të Phenianit, duke shtuar se tregtia me armë është një “e drejtë e ligjshme për një shtet sovran”.

“Por ne shfrytëzojmë këtë mundësi për të sqaruar një gjë. Ne kurrë nuk kemi eksportuar armë apo municione në Rusi më parë dhe nuk do të planifikojmë t’i eksportojmë ato”, tha zyrtari.

Ekspertët besojnë se Koreja e Veriut mund të bëhet një burim kryesor i armëve të vogla, artilerisë dhe municioneve të tjera për Rusinë, pasi që të dyja kanë sisteme mbrojtëse të bazuara në ato të zhvilluara gjatë epokës sovjetike.

Pavarësisht mohimit të së enjtes për shitjen e armëve, Koreja e Veriut ka treguar që nga fillimi i luftës në Ukrainë se shpreson të forcojë lidhjet me Rusinë. Ajo ka fajësuar SHBA-në për konfliktin dhe tha se veprimi ushtarak rus ishte një përgjigje e justifikuar ndaj “politikës hegjemoniste” perëndimore.

Koreja e Veriut ka treguar gjithashtu një interes për dërgimin e punëtorëve të ndërtimit për të ndihmuar në rindërtimin e rajoneve separatiste pro-ruse në lindje të Ukrainës.

Koreja e Veriut ka fituar tradicionalisht valutë të huaj duke dërguar qytetarët e saj për të punuar jashtë shtetit. Sipas sanksioneve të OKB-së, ata supozohej të ishin riatdhesuar deri në fund të vitit 2019, por një numër i konsiderueshëm punëtorësh nga vendi kanë vazhduar të punojnë në Rusi dhe Kinë, si dhe në Laos dhe Vietnam, që prej kalimit të afatit.

Në korrik, Koreja e Veriut u bë i vetmi vend pas Rusisë dhe Sirisë që njohu pavarësinë e territoreve, Donetsk dhe Luhansk.

Në një letër për të shënuar përvjetorin e muajit të kaluar të çlirimit të Koresë nga 35 vjet sundim japonez në fund të Luftës së Dytë Botërore, Putin i tha homologut të tij koreano-verior Kim Jong-un se vendet e tyre do të “zgjeronin marrëdhëniet gjithëpërfshirëse dhe konstruktive dypalëshe me përpjekje të përbashkëta”.

Në një mesazh drejtuar Putinit, Kim tha se “bashkëpunimi strategjik dhe taktik, mbështetja dhe solidariteti” midis dy vendeve ka arritur një nivel të ri mes përpjekjeve të tyre të përbashkëta për të frenuar kërcënimet dhe provokimet nga “forcat ushtarake armiqësore”. /noa.al