Kisha Ortodokse e Ukrainës shpall pavarësinë nga Kisha Ortodokse e Rusisë

Kisha Ortodokse e Ukrainës shpall pavarësinë nga Kisha Ortodokse e Rusisë

Dega e Kishës Ortodokse të Ukrainës në Moskë njoftoi të premten se ka shkëputur lidhjet me Rusinë pasi kjo e fundit filloi agresionin në Ukrainë, duke shpallur “pavarësinë e plotë” të saj nga autoritetet shpirtërore ruse, një veprim historik.

“Ne nuk jemi dakord me Patriarkun e Moskës Kirill (…) në lidhje me luftën në Ukrainë”, ka thënë kisha ukrainase në një deklaratë në fund të një këshilli kushtuar “agresionit” rus kundër vendit të saj, gjatë të cilit deklaroi “pavarësinë dhe autonominë e plotë të Kishës Ortodokse të Ukrainës”, shkruan Euronews, përcjell Telegrafi.

Sipas mediumit në fjalë, Dega e Kishës Ortodokse të Ukrainës në Moskë deri më tani ka qenë në varësi të Patriarkut rus Kirill, i cili e ka bërë të qartë mbështetjen e tij për ofensivën e presidentit rus Vladimir Putin kundër Ukrainës.

Në një deklaratë, këshilli dënoi luftën, duke e quajtur shkelje të urdhrit të Zotit “Mos vrisni” dhe shprehu ngushëllimet e tij për të gjithë ata që po vuajnë për shkak të konfliktit.

Sipas Kishës së Ukrainës, marrëdhëniet e saj me udhëheqjen e saj në Moskë kanë qenë “të komplikuara ose inekzistente” që nga shpallja e ligjit ushtarak në Ukrainë.

Ky veprim është përçarja e dytë ortodokse në Ukrainë në vitet e fundit. Një pjesë e Kishës ukrainase ishte shkëputur tashmë nga Moska në vitin 2019 për shkak të rolit të Kremlinit në vend.

Pushtimi i Vladimir Putinit dhe mbështetja e Kirillit për luftën e kishin vënë Kishën ukrainase ende të lidhur me Moskën në një situatë gjithnjë e më të paqëndrueshme.

Qindra priftërinj të saj kishin nënshkruar kohët e fundit një letër të hapur duke kërkuar që Kirill të gjykohej nga një gjykatë fetare për shkak të pozicioneve të tij mbi konfliktin. /Telegrafi/