Bastisje në Reçicë të Vogël, gjenden armë dhe privohen nga liria dy persona

Policia ka ngritur kallëzim penal për terrorizëm kundër një 20-vjeçari nga Reçica e Vogël. Rasti po ndiqet nga Prokuroria për Ndjekjen e Krimit të Organizuar dhe Korrupsionit (PP GOKK).

Sipas njoftimit, i riu në fund të janarit kishte dërguar përmes aplikacionit “Discord” kërcënim serioz se do të kryente sulm me armë zjarri, konkretisht me pushkë automatike AK-47 (kallashnikov). Ai kishte përmendur edhe masakrën e vitit 2012 në SHBA si frymëzim për veprimin e tij.

Rasti u zbulua pas informacioneve nga Ambasada e SHBA-së në Shkup, ndërsa policia në koordinim me prokurorinë identifikoi dhe lokalizoi të dyshuarin.

Më 17 shkurt 2026, policia, me asistencën e Njësisë Speciale Antiterroriste “Tigër”, kreu kontroll në një shtëpi në Reçicë të Vogël, rajoni i Tetovës.

Gjatë kontrollit u gjetën dhe u sekuestruan:

• një pushkë automatike AK-47 me municion,

• dy pistoleta me karikatorë dhe qindra fishekë,

• jelekë taktikë dhe antiplumb,

• thika dhe pajisje elektronike.

Dy persona janë arrestuar. Kundër 20-vjeçarit është paraqitur kallëzim për veprën penale “Terrorizëm”, ndërsa ndaj një 89-vjeçari është ngritur kallëzim për posedim dhe tregti të paautorizuar me armë.

Hetimet për rastin vazhdojnë.

MARKETING