` . Zhbogar: Derisa pritet data, duhet më shumë të punohet në përmirësimin e jetës së qytetarëve - TV-SHENJA

Zhbogar: Derisa pritet data, duhet më shumë të punohet në përmirësimin e jetës së qytetarëve

Derisa pritet data për negociata me BE-në, nevojitet që të gjithë faktorët, si Qeveria, institucionet dhe vetë Unioni të punojnë në përmirësimin e jetës së qytetarëve në vend, porositi shefi i delegacionit të BE-së në vend Samuel Zhbogar, duke u përgjigjur në pyetjen e gazetarëve rreth mosmarrjes së datës për negociata, gjatë vizitës së tij në Gostivar.

Zhbogar lidhur me këtë vendim të Këshillit Evropian në takimin e tetorit shfaqi keqardhje për rezultatin, por shfaqi edhe optimizëm se kjo mund të ndryshohet, sepse siç tha, vendet anëtare të BE-së, në muajt e ardhshëm do ta shqyrtojnë metodologjinë e re për zgjerim.

“Shpresoj se do të marrim vendim, por, nuk do të doja të ndërlidhem me afat, as të japë kornizë kohore. Këtu jam  tashmë tre vjet dhe deri më tani kam besuar në  afate dhe korniza kohore. Pas përvojës nga takimi i tetorit, nuk mundemi të premtojmë shumë në të ardhmen. Unë kuptoj se data është e rëndësishme si simbolike, ashtu edhe motivuese për qytetarët, por përcaktimi  i datës, nuk do ta ndryshojë jetën e qytetarëve. Derisa e presim datën, të gjithë ne, Qeveria, BE-ja,  institucionet, duhet të fokusohemi në punën  si të përmirësohet jeta e qytetarëve”, tha Zhbogar në konferencën për shtyp e cila u mbajt pas takimit me kryetarin e Gostivarit Arben Taravarin.