` . (VIDEO) Musiad takim me afaristët vendas - TV-SHENJA

(VIDEO) Musiad takim me afaristët vendas

Oda Ekonomike MUSIAD, ka mbajtur mbrëmë një takim me afaristë vendas dhe me afaristë nga Turqia, në përpjekje për të avancuar marrëdhëniet ekonomike mes dy vendeve. Drejtori i MUSIAD-it për Maqedoni dhe Ballkan, Bilall Kara, tha se qëllimi i tyre është që të luajnë rolin e një urë lidhëse mes afaristëve, duke mundësuar kështu rritjen e aktiviteteve ekonomike dhe uljen e papunësisë.

“Zyra jonë e cila u hap me datë 21 tetor të vitit të kaluar, ka filluar me aktivitetet e saja në të gjitha vendet e Ballkanit. Deri më tani kemi më shumë se 60 anëtarë nga Maqedonia, Shqipëria, Kosova, Serbia, Bulgaria dhe Greqia. MUSIAD-Ballkan është njëra nga përfaqësitë më të reja dhe njëkohësisht më të rëndësishme të MUSIAD-it. Qëllimi ynë është që të hapim dyert për rritjen e aktiviteteve ekonomike të anëtarëve tanë”, ka deklaruar Bilall Kara, drejtori i MUSIAD-it në Maqedoni.

Përparësitë për të investuar në Maqedoni, i prezantoi atasheu për çështje ekonomike pranë ambasadës turke, Bunjamin Kutllu, i cili tha se Maqedonia është një vend i sigurt për investitorët turq, duke e pasqyruar këtë edhe me investimet turke në sektorë të shumtë.

“Sapo të vini në aeroport, e shihni se bëhet fjalë për aeroport të kompanisë TAV. Gjatë rrugës do të shihni fabrikën e qumështit të SUTASH-it. Në kryeqytet dhe në qytetet tjera, do të shihni marketet e RAMSTOR-it, pastaj i keni spitalet ACIBADEM, Sante Plus, European EYE Hospital. Këtu kemi edhe Universitetin Ndërkombëtar Ballkanik, kompanitë e ndërtimit si Xhevahir Holding dhe Limak, si dhe shumë kompani tjera”, tha Bunjamin Kutllu, atashe për çështje ekonomike.

Duke prezantuar përparësitë e të investuarit në Maqedoni, avokati Kiril Popazovski përmendi marrëveshjen për stabilizim-asocim që Republika e Maqedonisë ka nënshkruar me BE-në, si dhe marrëveshjet bilaterale që Maqedonia i ka nënshkruar me Republikën e Turqisë. Nga ana tjetër, afaristët turq u shprehën se marrëdhëniet ekonomike mes dy vendeve duhet të intensifikohen edhe më tej, duke u shprehur të pakënaqur me nivelin e tanishëm.

Abdulla Berisha /SHENJA/

Musiad takim me afaristët vendas by tvshenjaofficial

 

 

 

 

Postime të Ngjajshme