` . PAN – TV-SHENJA

PAN

Shkruan: Agim POPOCI, Mitrovicë

Pas përfundimit të procesit zgjedhor në Kosovë, atëherë kur u bë e qartë se e vetmja risi nga këto zgjedhje doli Lëvizja Vetëvendosje me 27 % e votave të besuara, filluan edhe analizat e shumta mbi dështimin e projeksioneve të fitores së koalicionit PAN dhe pazaret deri te krijimi i qeverisë. Derisa konsumi politik dhe qeverisës më shumë se sa dështimi strategjik i partive politike e arsyeton rezultatin fatal nga procesi i fundit elektoral, i cili u refuzua nga më shumë se gjysma e qytetarëve me të drejtë vote në Kosovë, situata e krijuar postzgjedhore lë në harresë shumë defekte shtetërore që rrjedhin nga këto zgjedhje. Dhe, beteja vazhdon! Ja ku janë rreth 60 % e popullsisë që i thotë politikës JO. Por, si administrohet ky shtet me ato 40 % të votave të qytetarëve që e kryen detyrimin kushtetues më 11 qershor? Pyetja e parë që u parashtrua ishte se si do të krijohet qeveria? Apo, a mund ta ketë Kosova një qeveri e cila varet nga Lista Srpska e Vuçiqit?! Dhe, kush janë ata deputetë të LDK-së që janë të gatshëm “t’ia shesin” PAN-it votën për t’u krijuar qeveria, e cila ende pa u ngjizur kundërmon erë të tmerrshme?!

Derisa për drejtuesit e koalicionit PAN është normale krijimi i një qeverie, qoftë edhe me Listën Srpska dhe votat e deputetëve që nuk e kanë “xhepin parimor”, njohësit e rrethanave dhe dashamirësit e së ardhmes së Kosovës shqetësohen për dëmin moral dhe politik që mund t’ia bëjë kjo shitblerje e votës, dëm i cili u krijua kohë më parë edhe me rastin e zgjedhjes së Presidentit.

Këmbët e dhisë

Populli ynë ka një fjalë të urtë që në përditshmërinë tonë përdoret shumë dhe e sqaron edhe veprimin politik të PAN-it, që do t’i gjunjëzohet Listës Srpska e cila administrohet nga Aleksandar Vuçiqi, vetëm e vetëm për të krijuar qeverinë: “Na u bëre si këmbët e dhisë – po futesh ku nuk duhet!”. Por, është mitologjia greke ajo që shkon edhe më larg dhe, përveçse sqaron pse PAN-i është bërë si këmbët e dhisë, rastësi ose jo, ajo jep detaje mbi emërtimin, krijimin dhe veprimin e koalicionit PAN!

PAN sipas mitologjisë greke është zoti i barinjve, kopesë, arave, malit, fushave, mbrojtësi i tyre dhe mbrojtësi i gjuetarëve, andaj quhet edhe mbrojtës i natyrës. Përveç kësaj, është ithtar i muzikës dhe valltari më i mirë ndër hyjnitë greke. Dhe, PAN-i është i vetmi zot që besohej se është i vdekshëm.

Kjo ndodhi edhe në Kosovë. Kishim vetëm një mbrojtës të fushave dhe arave, të ajrit dhe të tokës; erdhi ky mbrojtës dhe u bë zoti, por shpresa e vetme është se ky zot ishte i vdekshëm. Dhe, për fatin e mirë të të gjithëve kjo e fundit është e vërtetë. Por, ky zot ka harruar për një çast këtë fakt dhe ka harruar pse është ndër popullin e Kosovë!

Çuditërisht edhe lindja e PAN-it, sipas mitologjisë greke, ka shumëçka të përbashkët me çorbën tonë politike, që u gatua për ta qeverisur vendin.

Derisa Hermesi po e ruante kopenë, e pa nimfën e bukur Driopa, u dashurua dhe si produkt i kësaj dashurie lindi një fëmijë i çuditshëm. Si foshnje lindi me këmbë të dhisë, me brinjë dhe mjekër. Pamja e foshnjës aq shumë e frikësoi nënën e, saj sa e kaploi një panik aq e madhe, e cila edhe sot njihet si panik frike. Grekët e vjetër, gjithashtu, besonin se frika dhe shqetësimi që shkakton PAN-i me pamjen e tij, por edhe me paraqitjen e tij, i frikësonte njerëzit, përkatësisht shkaktonte panik dhe, sipas tij, rrjedh edhe fjala panika. Nimfa Dropa, nëna e Panit, iku pa krye, duke e lënë Panin e vogël vet. Por, babai, Hermesi, ngeli i qetë, e mbështolli djalin me lëkurë lepuri dhe e mori me vete në Olimp, ku me krenari ua tregoi zotave.

Të kthehemi në realitetin e Kosovës. Kur shijuan pushtetin, uria për pushtet bëri që edhe PDK-AAK-NISMA të dashurohen aq shumë dhe, si produkt i kësaj dashurie, të lindi koalicioni PAN. Rezultati i zgjedhjeve tregoi se PAN-i nuk e arsyetoi dashurinë parazgjedhore dhe duhet të futen aty ku futen vetëm këmbët e dhisë dhe këtë ishte e gatshme ta bënte foshnja, e cila lindi nga rezultati i këtyre zgjedhjeve. Koalicioni qeverisës me serbët, që e paralajmëron PAN-i, përkatësisht koalicioni me Aleksandar Vuçiqin, përveç atij që e krijoi dhe tashmë heshtë nga frika që e ka kapluar, i ka shqetësuar edhe qytetarët e Kosovës, të cilët ende pyesin se si është e mundur që edhe pas 18 vjetësh në Kosovën e lirë qeverisja të varet nga Beogradi zyrtar. Nga ky Beograd i cili për 100 vjet e keqtrajtoi, përdhunoi dhe vrau, ndërsa sot vjen këmbëkryq në Prishtinë i lutur që të qeverisë me Kosovën, shtet të pavarur dhe sovran, siç ka dëshirë ta quajë Presidenti i saj!

Dhe, jo vetëm kaq! Ky koalicion qeverisës projektohet për miratim me të njëjtën mënyrë siç u zgjodh i pari i “Olimpit të Kosovës” me xhepshpuarit e LDK-së, një parti nga e cila Kosova kishte fatkeqësinë të përjetonte vetëm çaste tmerri dhe tradhtie.

Kujdes nga PAN-i!

Tani, PAN-i i vogël me këmbët e dhisë po pret të vazhdojë rrugën drejt “Olimpit të Kosovës”, aty ku serbët e Listës Srpska dhe ata të LDK-së do ta bëjnë krenar të parin e këtij vendi me qeverinë e cila mund të krijohet, edhe pse është e sigurt se do të dështojë. Dhe, ky dështim ndoshta nuk do të përqeshet aq shumë si në rastin e zotit Pan, por fundi i tij detyrimisht do të jetë i ngjashëm!

Në Olimp zotat aq shumë qeshën dhe e përqeshën, saqë Pani fatkeq thjesht iku nga familja dhe siguria e Olimpit, në malet e errëta dhe të rrezikshme. Dhe, kaloi një jetë pa brenga dhe me hare…

Po, i ngjashëm, sepse siguria ekonomike që ka krijuar ky koalicion së bashku me ata serbë të LDK-së për të ardhmen e familjes së tyre, nuk ka se si të jetë ndryshe – vetëm se pa brenga dhe hare; për dallim prej atyre që ia dhanë votën për 17 vjet dhe jetojnë në mjerim, me shpresën se PAN-i është i vdekshëm dhe pasardhësit e tyre do të jetojnë në një Kosovë edhe pa PAN-in. Po kjo do të ndodhë, është e sigurt, por “aristokratët” e krijuar pas luftës do të lënë pasardhës “aristokratë” të, cilët nuk do t’i japin llogari askujt në “Olimpin e Kosovës” se pse baballarët e tyre vepruan dhe të mos harrojmë, u lejuan ta plaçkitin këtë vend aq të vogël që nuk po shteron kurrë me gjithë këtë vjedhje!

Ndërkohë edhe për ata që nuk presin së shpejti “vdekjen” e PAN-it, por mendojnë se mund ta marrin pushtetin, Lëvizja Vetëvendosje, fusha nuk është përplot me lule. Mitologjia greke thotë se Pani ishte i keq dhe i dhunshëm kur zgjohej papritur nga gjumi. Pakujdesia e atyre që e zgjuan u pagua me atë që në momentin kur ky zgjohej, i kaplonte një panik nga frika e madhe. Ushtarët pers e paguan në vitin 490 p.e.s. kur e zgjuan Panin duke sulmuar istikamet e athinasve. Pani aq shumë u tërbua, thotë mitologjia greke, saqë gërthiti aq shumë mbi ushtarët pers, të cilët i kaploi paniku dhe ata e braktisën fushëbetejën.

Në shenjë falënderimi, ushtarët e Athinës i kanë ngritur një mekam në një shpellë në afërsi të Maratonit.

Nëse shqiptarët në Kosovë kanë fat dhe nëse Lëvizjes Vetëvendosje i jepet rasti, nuk ka pse eksperimenton. Lëreni në gjumë, mos i zgjoni sikur edhe të jeni të sigurt se askush në Kosovë nuk do të tmerrohet ose nuk e kap paniku.

Kosova e qeverisur pa PAN-in nuk e dimë si është, por me këta që e duan qeverinë si këmbët e dhisë, qytetari i Kosovës është i ngopur. Nuk është vetëm në panik, por i lodhur, i dërrmuar dhe me gjithnjë e më pak shpresë.