` . Mali i Zi lejon hyrjen për banorët e Kosovës, jo edhe për ata të Serbisë - TV-SHENJA

Mali i Zi lejon hyrjen për banorët e Kosovës, jo edhe për ata të Serbisë

Qytetarët e Kosovës prej 1 qershorit mund të hyjnë në territorin e Malit të Zi.

Këtë e ka bërë të ditur të enjten mbrëma përmes një postimi Trupi Koordinues Nacional i Malit të Zi, që ka vendosur me propozim të Institutit për Shëndet Publik të Malit të Zi.

Mali i Zi lejon hyrjen në territorin e këtij vendi, pa karantinë dhe vetëizolim, të banorëve të vendeve që kanë më pak se 25 të infektuar për 100 mijë banorë.

Lista do të vlerësohet çdo javë, ndërsa në të aktualisht janë Sllovenia, Islanda, Kroacia, Sllovakia, Shqipëria, Austria, Norvegjia, Monako, Kosova, Gjermania, Greqia, Hungaria, Danimarka, Lituania, Letonia, Azerbajxhani, Luksemburgu, Bosnjë-Hercegovina, Bullgaria, Izraeli, Maqedonia e Veriut, Irlanda, Çekia, Finlanda dhe Estonia.

“Mali i Zi nuk mbyll kufijtë. Përkundrazi. Kufijë tanë po i hapim dhe atë në përputhje me sugjerimet e profesionistëve, për shumë vende, për të mirën e qytetarëve dhe të turistëve që do të na vizitojnë këtë verë”, ka thënë Milutin Simoviq, kryetar i Trupit Koordinues.

Në listë nuk është Serbia, ndërsa mbajtja mbyllur e kufijve të Malit të Zi për qytetarët e Serbisë ka ngjallë reagime të shumta në Serbi në ditët e fundit. Në Serbi kanë thënë se mbyllja e kufijve nuk bëhet për shkak të koronavirusit. Më herët ishte paralajmëruar se kufijtë e Malit të Zi nuk hapen për Serbinë, që nuk plotëson kriterin sa i takon përqindjes së të infektuarve.