` . Barça rikthehet tek fitorja, fiton me goleadë Valencian - TV-SHENJA

Barça rikthehet tek fitorja, fiton me goleadë Valencian

Barcelona u rikthye te fitorja në kampionat, duke mposhtur Valencian me rezultatin 5-2 dhe njëkohësisht duke u hakmarrë ndaj këtyre të fundit, për atë humbje në finalen e Kupës së Mbretit, në maj të këtij viti.

Pa Messin e Dembele, trajneri Valverde mbajti Suarez në stol dhe e nisi lojën me talentin Ansu Fati nga minuta e parë në fushë, ndërsa ky i fundit e shpërbleu duke shënuar gol që në minutën e tretë, pas një asisti të De Jong.

Vetëm 4 minuta më vonë ishte sulmuesi Fati që “i ktheu borxhin” holandezit, duke e shërbyer saktë në zonë dhe De Jong arriti të dyfishojë rezultatin, por Valencia rihapi ndeshjen me anë të Kevin Gameiro në minutën e 27’.

Megjithatë në pjesën e dytë katalanët ishin dominues totalisht dhe fillimisht shënuan me Pique, ndërsa më pas erdhi radha e Luis Suarez që të zbresë në fushë dhe të shënojë dy herë, për të vulosur suksesin 5-2.

Më herët, Atletico e Madridit bëri një hap fals në transfertën ndaj Real Sociedadit, ku humbi 2-0, pasi pësoi dy gola në pjesën e dytë dhe u detyrua të dalë pa pikë. Fitore të thellë 0-3 mori edhe Villareali në transfertën ndaj Levantes.